7 Views

لبستك حلم والعقل رح بيطير
كل ما حكيتك جن فيي القهر
خوفي من جنونك بعد ما يصير
يجرف بدربو حب صرلو دهر

بحسك معي مرات طفل صغير
راكض ورا أمو ت يغمر غمر
وساعات ما بلاقي إلك تبرير
قسوة حكي حفرت بقلبي حفر

كافي بقى ضجران قلبي كتير
وعا غيرتك ما عاد عندي صبر
الله معك وان كان حلمي كبير
جرحي انا بينزل معي ع القبر

 

 

ما عاد عم بيساع ذاكرتي
البيت اللي اهلو نور اولتي
هني اللي كانو الطهر من صغري
متل حد السيف بِضهري
شوفوا السهم علم ع خاصرتي

 

 

 

مش هم لولا غفيت ع الاوهام
ولا هم لولا الصدق جرّحني
ما تعودت اغفى ع ريش نعام
مخدة ضميري بفصل الاحلام

وبنام ع الجنب لْ بريحني

 

 

واخطرت ع بالي متل أحلام
بلمح البصر جفنك نده اسمي
يمكن مرق طيفك متل نسمة
رش الدمع ع مخدة الاوهام
فيق مرا عم تصرخ بجسمي

الشاعرة نايفة عون